Urdu 20translation 20event creative 20writing header

پوسٹ گریجویٹ کالج اصغر مال، راولپنڈی میں اوکسفرڈ اردو کا ایونٹ


اوکسفرڈ اردو ڈکشنری نے ایک خصوصی پروگرام شروع کیا ہے جس کے تحت ہمارے لینگویج مینیجر مختلف کالجوں اور یونیورسٹیوں میں جا کر طلبہ اور استاتذہ کو اردو/انگریزی ترجمے کے بارے میں اوکسفرڈ کی فراہم کردہ سہولیات کے بارے میں 

معلومات فراہم کرتے ہیں اور اس دوران اردو ڈکشنری کی ویب سائٹ استعمال کرنے اور اس میں الفاظ شامل کرنے کے بارے میں آگاہ کرتے ہیں۔


گذشتہ ہفتے انھوں نے راولپنڈی کے پوسٹ گریجویٹ کالج اصغر مال کا دورہ کر کے طلبہ کو اوکسفرڈ یونیورسٹی کی اس پیش کش کے بارے میں آگاہ کیا۔


اس خصوصی پروگرام کا انعقاد کالج کے شعبۂ اردو کے سربراہ ڈاکٹر روش ندیم اور اردو کے لیکچرر عدنان بشیر کی کاوشوں کی بدولت ممکن ہو سکا۔ لینگویج مینیجر ظفر سید نے ایم اے اردو کے طلبہ کو اوکسفرڈ گلوبل انیشیٹیو کے بارے میں بتایا جس کے تحت اوکسفرڈ نے اردو سمیت دنیا کی ایک سو ایسی زبانوں کو منتخب کیا ہے جن کی ڈیجیٹل نمائندگی نسبتاً کم ہے۔ اس مہم کی بدولت کوشش کی جا رہی ہے کہ ان زبانوں کے آن لائن وسائل میں اضافہ کیا جائے۔


اوکسفرڈ اردو ڈکشنری ایسی منفرد ڈکشنری ہے جسے ’رواں لغت‘ کہا جا سکتا ہے۔ اس کا مطلب یہ ہے کہ زبان کے ہر دم بدلتے ہوئے اور پھلتے پھولتے منظرنامے کو آن لائن اس طرح محفوظ کیا جائے کہ ہر شخص لغت میں الفاظ، محاورے اور ضرب الامثال، اور ان کی تعریف اور مثالیں شامل کر سکے۔


اس ایونٹ کے دوران طلبہ کو علمی طور پر اوکسفرڈ اردو ڈکشنری میں خود الفاظ شامل کرنے کا طریقہ بھی سمجھایا گیا۔


اس پروگرام میں طلبہ اور استاتذہ نے یکساں دلچسپی دکھائی اور کئی ایسے الفاظ کی نشان دہی کی جو لغت میں موجود نہیں تھے، جنھیں انھیں اسی وقت شاملِ لغت کر لیا گیا۔


اس کے بعد اوکسفرڈ اردو کے لینگویج مینیجر نے طلبہ کو تخلیقی تحریر کے بنیادی اصولوں کے بارے میں بھی بتایا اور کہا کہ تخلیق کا سب سے بنیادی کلیہ یہ ہے کہ ’آمد‘ کا انتظار کیے بغیر باقاعدگی سے ایک وقت مخصوص کر کے اس کے دوران لکھا جائے، اور اس دوران کوشش کی جائے کہ ذہن ہر طرح کے انتشار سے پاک ہو کر پوری یکسوئی سے تخلیق پر توجہ مرکوز کر سکے۔‘


گورنمنٹ پوسٹ گریجویٹ کالج اصغر مال کے شعبہ اردو کے سربراہ ڈاکٹر روش ندیم نے اوکسفرڈ کی اس کاوش کو سراہا اور اپنی طرف سے بھرپور تعاون کا یقین دلایا۔


اگر آپ بھی اپنے ادارے میں اس قسم کے تعلیمی پروگرام منعقد کروانا چاہتے ہیں تو ہم سے اس ای میل پر رابطہ کر سکتے ہیں:

UrduCommunity@oup.com


The opinions and other information contained in OxfordWords blog posts and comments do not necessarily reflect the opinions or positions of Oxford University Press.

Powered by Oxford