Cretaive 20writing

تخلیقی لکھائی کیسے شروع کریں؟


تخلیقی لکھائی تعلیمی، پیشہ ورانہ، تیکنیکی اور صحافتی لکھائی سے مختلف ہے کیونکہ تخلیقی لکھائی میں آپ اعداد و شمار اور حقائق پیش نہیں کرتے- تخلیقی لکھائی تفریح طبع کے لیےکی جاتی ہے اور لکھاری اپنی زندگی کے تجربات کو استعمال کرتے ہوئے قارئین کی تفریح، اصلاح اور اچھے کاموں کی حوصلہ افزائی کے لیے لکھتا ہے-

تخلیقی لکھائی میں سب سے بڑا مسئلہ اس کا آغاز کرنا ہے- کچھ لوگ سوچتے ہیں اور لکھنا شروع کر دیتے ہیں جبکہ کچھ اسی پس و پیش میں رہتے ہیں کہ ابتداء کہاں سے کی جائے- درج ذیل تجاویز تخلیقی لکھائی کا آغازکرنے میں مددگار ہو سکتی ہیں: 


۱- مطالعہ بڑھائیں

اگر آپ ایک اچھے لکھاری بننا چاہتے ہیں تو زیادہ سے زیادہ مطالعہ کرنا شروع کر دیں- اس طرح آپ کو نت نئے خیالات ملیں گے، لکھنے کے مختلف طریقوں سے آشنائی ہو گی اور لکھنے کا آغاز کرنا کبھی آپ کو مسئلہ نہیں لگے گا-


۲- مشاہدہ بڑھائیں

آپ اگراچھے لکھاری بننا چاہتے ہیں تو آپ کو اپنی مشاہدہ کرنے کی صلاحیت بڑھانا چاہیئے- چلتے پھرتے، سیر کرتے، دوستوں سے گفتگو کرتے، پارٹی کرتے، فلم یا ڈرامہ دیکھتے یا کوئی کتاب پڑھتےوقت ہر چیز پر غور کریں- اس سے آپ کو لکھنا شروع کرنے میں آسانی ہو گی اور آپ کو نئے خیالات بھی ملیں گے-


۳- ڈائری لکھیں

اگر آپ تخلیقی لکھاری بننا چاہتے ہیں تو آپ کو آج سے ڈائری لکھنا شروع کر دینا چاہیئے- اس سے آپ کو دو فائدے ہوں گے: ایک آپ کی لکھنے سے متعلق ہچکچاہٹ کم ہوتی جائے گی اوردوسرے آپ کو لکھنا شروع کرنا کبھی بھی مسئلہ نہیں لگے گا- دوسرا یہ کہ گاہے بگاہے دماغ میں آنے والے خیالات آپ محفوظ کر سکیں گے جن پر آپ بعد میں کبھی بھی لکھ سکتے ہیں-


٤-  موضوع کا تعین

جب آپ کوئی تخلیقی لکھائی کرنا چاہتے ہوں تو سب سے پہلے یہ فیصلہ کریں کہ آپ نے ناول لکھنا ہے، مضمون لکھنا ہے، نظم لکھنا ہے یا کچھ اور لکھنا ہے- اس فیصلے سے آپ کے ذہن میں ایک خاکہ بننا شروع ہو جائے گا اور خیالات جمع ہوتے رہیں گے- انھیں خیالات میں سے آپ کو ایک موضوع مل جائے گا جس پر آپ لکھنا شروع کر سکتے ہیں-


۵- لکھنے میں باقاعدگی

 اچھا لکھاری بننے کے لیے کچھ کام اپنی عادت بنا لیں جیسے روزانہ مطالعہ کرنا اور روزانہ کچھ نا کچھ لکھنا- کوشش کریں کہ روزانہ کسی اچھے لکھاری کی کوئی تحریر پڑھیں- اس سے آپ کو خیالات ملیں گے اور لکھنے کے مختلف انداز سے آگاہی ہو گی- اسی طرح روزانہ کچھ ضرور لکھیں- ایسا کرنے سے آپ کی جھجک ختم ہو گی اور آپ رفتہ رفتہ ایک اچھے لکھاری بن سکیں گے-


٦- لکھنے کی جگہ اور وقت

تخلیقی لکھائی بعض اوقات اس لیے بھی نہیں ہو پاتی کہ ہمیں نا تو مناسب وقت میسر آتا  ہے نا ہی جگہ- سب سے پہلے ایک پرسکون جگہ کا انتخاب کریں کیونکہ اگر بار بار کوئی مخل ہو گا تو آپ کے خیالات منتشر ہو جایئں گے اور تحریر یا تو ممکن ہی نا ہو پائے گی یا پھر بے ربط ہو گی- دوسرا یہ کہ روزانہ لکھنے کے لیے ایک وقت مقرر کر لیں  بھلے وہ چند منٹ ہی کیوں نا ہوں- اس طرح آپ روزانہ کچھ لکھیں گے جو بتدریج بڑے بڑے ناولوں اور مضامین کی صورت اختیار کر لے گا-

مختصرالفاظ میں یہ کہ اگر آپ بہت بڑے لکھاری بننا چاہتے ہیں تو انتظار مت کریں، قلم اٹھایئں اور لکھنا شروع کر دیں، آپ ایک دن بہت نامور لکھاری بن جایئں گے-



<<اوکسفرڈ لِونگ ڈکشنریز سے تحریر، صرف و نحو اور روزمرہ کے بارے میں مزید معلومات حاصل کریں<<




The opinions and other information contained in OxfordWords blog posts and comments do not necessarily reflect the opinions or positions of Oxford University Press.

Powered by Oxford