Festive food pakistan800x234

اردو بولنے والے ممالک میں تہواروں کے کھانے

ہمارے تہواروں پر کچھ خاص پکوان تیار کیے جاتے ہیں جو زیادہ تر تو میٹھے ہوتے ہیں لیکن نمکین پکوان بھی بنائے جاتے ہیں۔ یہاں تہوار عام طور پر مذہبی حوالوں سے ہوتے ہیں جیسے مسلمانوں کی عیدیں، ہندووں کی ہولی اور دیوالی، مسیحیوں کا کرسمس اور ایسٹر، سکھوں کی بیساکھی اور پارسیوں کا نوروز وغیرہ۔ کوئی کوئی تہوار موسم کے حوالے سے بھی ہوتا ہے جیسے بسنت۔  

عیدالفطر کا خیال ذہن میں آتے ہی سویاں اور ان جیسے دوسرے میٹھے پکوان ذہن میں ابھرتے ہیں جیسے شیر خورمہ وغیرہ۔ بعض علاقوں کی روایات کے مطابق زردہ، کھیر اور مختلف طرح کے حلوے بنائے جاتے ہیں جیسے سوجی کا حلوہ، بیسن کا حلوہ وغیرہ۔ ان ڈشوں پر خشک میوے جیسے بادام، پستے، کشمش، ناریل اور چھوہارے وغیرہ چھوٹے چھوٹے کتر کر پھیلا دیے جاتے ہیں جو ذائقے اور خوش نمائی و دلکشی میں اضافے کا باعث بنتے ہیں۔ ان پر چاندی کے ورق بھی لگائے جاتے ہیں۔ روح کیوڑہ اور عرق گلاب کی خوشبو ان کھانوں کو ان کی روایتی مہک دیتی ہے۔

عید سے پہلے رمضان کے دوران سحری میں کھجلہ پھینی اور افطاری میں کھجور، پکوڑے، سموسے، دہی بڑے، چنا چاٹ اور فروٹ چاٹ مقبول ہیں۔ افطاری میں پیاس کی تسکین کے لیے طرح طرح کے شربت بنائے جاتے ہیں۔ 12 ربیع الاول کو بھی حلوے اور زردے سمیت میٹھے پکوان پکائے جاتے ہیں۔ جو سب نہ صرف شوق سے کھاتے ہیں بلکہ بچے بڑے شوق سے محلے پڑوس میں دے کر بھی آتے ہیں۔

عید قرباں پر گوشت کی فراوانی ہوتی ہے اور اسی لحاظ سے تقریبا تمام ڈشوں میں گائے اور بکرے کا گوشت شامل ہوتا ہے۔ اکثر اوقات سب سے پہلے مسالے دار دل کلیجی بنتی ہے۔ پھر بھنا گوشت، بریانی اور پلائو سب سے مقبول ڈشیں ہوتی ہیں۔ اس کے علاوہ لوگ باربی کیو کرتے ہیں جس میں سیخیں، گولے کے کباب اور بہاری کباب بنائے اور کھائے جاتے ہیں۔ لوگ بیکریوں سے سجی اور سالم ران بھی تیار کرواتے ہیں۔ شوقین لوگ پائے بھی پکاتے ہیں یا تندوری ران بنواتے ہیں۔

عاشورے کے موقعے پرحلیم پکایا جاتا ہے اور تبرک کے طور پرتقسیم کیا جاتا ہے۔ یہ ایک نمکین ڈش ہے جس کی تیاری میں گندم، دالیں، جو اور گوشت استعمال کیا جاتا ہے۔ اسے پیش کرتے وقت لیموں کے ٹکڑے، تلی ہوئی پیاز، باریک کتری ہوئی ہری مرچیں، ادرک اور ہرا دھنیہ بھی پیش کیا جاتا ہے۔ مجالس میں شیرمال، تافتان، چھولے والے چاول، اور بریانی تقسیم کی جاتی ہے۔ محرم میں خاص طور پر قائم کی گئی سبیلوں پر ٹھنڈے پانی کے ساتھ ساتھ شربت بھی تقسیم کیا جاتا ہے۔ 

کرسمس کے تہوار پر مسیحی برادری کے لوگ کیک کی مختلف قسموں سے لطف اندوز ہوتے ہیں جس میں فروٹ کیک سب سے زیادہ مقبول ہے۔ پارسی برادری کے تہوار نوروز پر سیو (بادام اور خشک میووں والی سویاں)، ماوا، روا اور میٹھا دہی پیش کیے جاتے ہیں۔

رنگوں کے ہندو تہوار ہولی پر مسالے دار میٹھا دودھ اور روغنی نان اور روشنیوں کے تہوار دیوالی پر مٹھائیاں بہ کثرت کھائی جاتی ہیں۔ سکھ برادری کے تہوار بیساکھی پر روایتی کھانوں میں مٹھائیاں مقبول ہیں۔

بسنت کے موقعے پر مٹھائیاں، حلوہ پوری اورنان پائے کھائے جاتے ہیں۔

See more from ​ذخیرۂ الفاظ​