آپ کو کون سا شعبہ اپنانا چاہیے؟

یہ طے کرنا کہ آپ کس پیشے میں جائیں گے، بہت زیادہ اہمیت کا حامل ہے۔ اگر آپ ضروری معلومات جمع کر نے اور مناسب سوچ بچار کے بعد درست پیشہ اپنائیں گے تو ممکن ہے ساری عمرآپ کا دل اس میں لگا رہے اور آپ ترقی کی منزلیں طے کرتے جائیں۔

اس کے برعکس اگر ضروری معلومات کے بغیر اور جلد بازی میں کوئی پیشہ اپنا لیا جائے جو آپ کے لیے مناسب نہیں تو ممکن ہے کہ کچھ ہی عرصے بعد آپ پیشے کی تبدیلی پر غور کرنے پر مجبور ہو جائیں۔ پیشہ بدلنا ویسے تو کوئی گناہ نہیں لیکن اس طرح آپ کی اب تک کی محنت ضائع ہو جائے گی۔ نئے کام میں شاید صفر سے نیا آغاز کرنا پڑے گا۔

اس لیے جب پیشے کے انتخاب کے فیصلے میں وقت لگ رہا ہو تو گھبرانا نہیں چاہیے۔ اس وقت اس میں توجہ سے تھوڑا سا وقت لگانا بعد میں بہت سا وقت بچا سکتا ہے۔ سب سے اہم وہ اطمینان اور خوشی ہو گی جو آپ کو صحیح پیشے میں کام کرنے سے ساری عمر حاصل ہوتی رہے گی۔ اس کے ساتھ ساتھ آپ اس شعبے میں ترقی کی منازل طے کرتے جائیں گے۔

سب سے پہلے یہ سوچیں کہ آپ کی دلچسپیاں اور مشاغل کیا رہے ہیں۔ ایسا سوچنے سے بھی فائدہ ہو سکتا ہے کہ اگر آپ کے ہاتھ بہت سی دولت لگ جائے تو اسے کون سے شوق پورا کرنے پر خرچ کریں گے۔ اگر بہت سی فرصت مل جائے اورآپ فکروں سے آزاد ہوں تو یہ وقت کس قسم کی سرگرمیوں میں خرچ ہو گا۔

یہ سوچنا بھی کارآمد ہو سکتا ہے کہ سکول اور کالج کے زمانے میں آپ نے جو پروجیکٹ کیے ان میں آپ کو کون سے سب سے اچھے لگے تھے۔ پھر یہ کہ طالب علمی کے زمانے میں کون سے مضمون میں آپ کو سب سے زیادہ دلچسپی تھی۔ اب تک کی زندگی میں آپ نے کچھ مہارتیں حاصل کی ہوں گی اور تعلیمی دنیا میں اور اس کے باہر کچھ ہنر سیکھے ہوں گے۔ وہ کیا کیا ہیں؟

اب تک کی اس مشق سے نہ صرف آپ اپنے آپ کو بہتر طور پر سمجھنے لگ گئے ہوں گے بلکہ یہ بھی کہ آپ کس قسم کا کام کر کے خوشی محسوس کرتے ہیں۔ اب آپ معلومات جمع کریں کہ آپ کی دلچسپی کے یہ کام کس کس پیشے میں کیے جاتے ہیں۔ ان سب پیشوں کی فہرست بنا لیجیے۔

اگلے مرحلے میں یہ دیکھیے کہ ان میں سے کون کون سا پیشہ آپ اپنی موجودہ تعلیم، مہارتوں اور قابلیتوں کے ساتھ اپنا سکتے ہیں۔ ممکن ہے آپ اپنے پسندیدہ ترین پیشے میں فوری طور پر جا سکتے ہوں۔ مبارک ہو، آپ کی منزل قریب ہے۔ اگر آپ کاروبار کر کے اس پیشے میں جانے کا فیصلہ کرتے ہیں تو اپنا کاروبار منظم کرنے کی تیاری کریں۔ ملازمت کا پروگرام بنے تو ان کمپنیوں اور اداروں کو درخواستیں بھیجنا شروع کر دیں جو اس پیشے کی ملازمت پیش کرتی ہوں۔  

اگر آپ کا خواب پورا کرنے کے لیے آپ کو اعلیٰ ڈگری کی ضرورت ہے تو وہ حاصل کرنا پڑے گی۔ اعلیٰ تعلیم و تربیت مہنگی ہو سکتی ہے۔ اگر آپ کے پاس وسائل کم ہیں تو بھی مایوس ہونے کی ضرورت نہیں۔ اپنی پسند کے شعبے میں عارضی طور پر قدرے نچلے درجے کی ملازمت کرنے سے بھی آپ کو خوشی حاصل ہو گی۔ اس کے ساتھ ساتھ اپنی ڈگری کے لیے پیسے جمع کریں یا سکالرشپ یا تعلیمی قرض تلاش کریں اور اپنی ضرورت کی ڈگری کی طرف قدم بڑھائیں تاکہ بالآخر آپ اپنی پسند کے پیشے میں جا سکیں۔