Cv808x234

اچھی سی وی کیسے تیار کی جائے

سی وی ایک جامع دستاویز ہے جو آپ کے ذاتی تعارف کے لیے ایک آلے کی حیثیت رکھتی ہے۔ سی وی آپ کی تعلیمی قابلیت، پیشہ تجربے، اور مہارتوں سمیت دیگر کوائف کا اظہار ہے۔ سی وی اس امر کی نشاندہی بھی کرتی ہے کہ آپ کی مطلوبہ ملازمت کے لیے آپ کس قدر موزوں ہیں۔ یوں کہا جا سکتا ہے کہ سی وی آپ کے ماضی و حال کے اہم کارناموں، تجربات اور رجحانات کا خلاصہ ہے۔ اس دستاویز کا مقصد یہ ہے کہ آپ کی پیشہ ورانہ زندگی کا مختصر اور جامع تعارف متعلقہ ادارے تک پہنچ جائے تاکہ وہ اس کو دیکھ کر آپ کو انٹرویو یا دیگر مراحل کے لیے منتخب کر لے۔

اچھی سی وی لکھنا بھی ایک فن ہے، کیونکہ سی وی پر ہی آپ کے ملازمت ملنے کے پہلے امکان کا دارومدار ہے۔ سی وی واضح اور جامع ہونی چاہیے۔ بہت گنجلک، باریک یا غیر ضروری طور پر خالی جگہیں نہ چھوڑ دی گئی ہوں۔ ہر بات الگ الگ بیان کی گئی ہو تاکہ قاری کے لیے اسے سمجھنا آسان ہو۔ صرف اہم معلومات شامل ہوں، غیر ضروری مواد شامل کرنے سے گریز کیا جائے۔ غلط بیانی سے پاک ہو، اپنی صلاحیتوں کو بڑھا چڑھا کر بیان نہ کیا جائے۔ جو اجزا زیادہ اہم ہوں، انھیں سی وی کے ابتدائی حصے میں لکھا جائے۔ اگر سی وی بذریعہ ڈاک بھیجنا ہے تو اسے موڑنے سے گریز کیا جائے اور اے فور کے لفافے میں سیدھا رکھ کر ارسال کیا جائے۔ اس کے علاوہ بھی کئی ایک ضروری ہدایات ہیں جو کسی سی وی کو بہترین بناتی ہیں۔

سب سے پہلے یہ سمجھ لیا جائے کہ سی وی کی اقسام کیا ہیں اور کس انداز میں کون سی سی وی تیار کی جاتی ہے۔

سی وی کی عام طور پر تین قسمیں ہیں۔

- تاریخ وار سی وی یا کرونولوجیکل سی وی

- فعال سی وی یا فنکشنل سی وی

- مجموعی سی وی یا کمبی نیشنل سی وی

اگر آپ ایک سے زائد اور مختلف نوعیت کی ملازمتوں کے لیے درخواست بھیج رہے ہیں تو آپ ایک سے زیادہ سی وی فارمیٹ پر غور کر سکتے ہیں۔

تاریخ وار یہ سب سے روایتی انداز کی سی وی ہے اس میں واقعات و تجربات ان کی زمانی ترتیب میں درج کیے جاتے ہیں۔

فعال سی وی میں تجربات ان میں درج مہارتوں کی ترتیب سے لکھے جاتے ہیں۔

مجموعی سی وی میں بیک وقت تاریخ وار اور فعال دونوں انداز کی پیروی کی جاتی ہے۔


سی وی کی بنیادی معلومات

وہ خاص حصے جو سی وی میں دیکھے جاتے ہیں یا انٹرویو لینے والے کو جن امور کو دیکھنے کی امید ہوتی ہے اس میں درج ذیل شامل ہیں:

1۔ آپ سے رابطے کی تفصیلات

2۔ ذاتی بیان

3۔ تجربہ

4۔ تعلیمی قابلیت

5۔ کامیابیاں

6۔ شوق اور دلچسپیاں

7۔ حوالہ جات

سی وی کتنی طویل ہونی چاہیے

سی وی بہت لمبی چوڑی نہ ہو۔ ایک اچھی سی وی زیادہ سے زیادہ دو صفحات پر مشتمل ہوتی ہے۔ ایسی سی وی پڑھنے والے پر اچھا تاثر دیتی ہے کیونکہ یہ پڑھنے اور سمجھنے میں آسان ہوتی ہے۔ تعلیم، تجربے اور تربیتی کورسز کے حوالے سے مختصر نکات لکھ دینا کافی ہے تاکہ باقی معلومات انٹرویو میں پوچھی جا سکیں۔ سوال یہ پیدا ہوتا ہے کہ دو صفحات کی سی وی کیسے بنائی جائے جو جامع بھی ہو۔ اس ضمن میں درج ذیل ہدایات کو مدنظر رکھیں تو خاصی مدد مل سکتی ہے:

- سی وی میں مارجن کم ہوں

- فونٹ سائز بہت بڑا نہیں بلکہ مناسب ہو تاکہ کہ بآسانی پڑھا جائے۔ 

- ہ وسکے تو تعلیم وغیرہ کے لیے دو یا تین کالم کے جدول بنائے جائیں۔

- بڑی بڑی سطریں لکھنے کی بجائے بلٹس استعمال کیے جائیں۔

- سطروں کے درمیاں یک سطری (سنگل لائن) فاصلہ رکھا جائے۔

- سی وی میں ہیڈر بھی شامل کیا جائے جس میں آپ کا نام، پتہ، فون نمبر، اور ای میل ایڈرس درج ہو۔

- کیریئر کے مقاصد واضح اور دوٹوک ہوں جو زیادہ سے زیادہ دو سطروں پر محیط ہوں۔

- مہارتیں، تجربات، اور کارکردگی کا حوالہ صرف سرخیوں کی شکل میں دیں یا جدول بنا دیجیے۔

- تعلیم، تعلیمی اداروں کا حوالہ، تربیت یا کام سے متعلق سرگرمیاں ان کی الگ فہرست بنائیں۔

- نمایاں کامیابیاں، ایوارڈز وغیرہ کا حوالہ ضرور شامل کیجیے۔

- ذاتی دلچسپیاں ضرور تحریر کیجیے کہ ان سے آپ کی تخلیقی صلاحیتوں اور ذہنی اپج کا اظہار ہوتا ہے۔

- حوالے میں انھی لوگوں کے نام لکھیں جو آپ سے اچھی طرح واقف ہوں، حوالہ اسی وقت پیش کیجیے جبکہ وہ ملازمت کی شرائط میں شامل ہو۔

- تخلیقی صلاحیت کا اظہار سی وی کے ڈیزائن اور لے آؤٹ سے بھی ہوتا ہے۔

- سی وی بنا کر ایک بار خود بھی اچھی طرح پڑھ لیں اور اپنے ارد گرد کے کسی قابل شخص کو بھی دکھا لیں تاکہ غلطی کی گنجائش باقی نہ رہے۔

- وقتاً فوقتاً اپنی سی وی کو اپ ٹو ڈیٹ کرتے رہیں۔

- اگر ای میل کے ذریعے سی وی بھیجنا مقصود ہو تو پی ڈی ایف فائل بنائیں تا کہ بآسانی کسی بھی جگہ کھول کر پڑھی جا سکے۔


سی وی بنانے سے متعلق بار بار پوچھے جانے والے سوال

1. کیا سی وی بناتے وقت تصویر شامل کی جائے؟

سی وی میں تصویر شامل نہ ہی کی جائے تو بہتر ہے۔

2. کیا سی وی بناتے وقت بلٹس یا پیرا گراف شامل کر سکتے ہیں؟

 بلٹس اور پیراگراف بات کو واضح کرتے ہیں اس لیے ان کا شامل کرنا سی وی کی شکل کو بہتر بناتا ہے۔

3. ملازمت کی تاریخ کتنی پرانی شامل کی جائے؟

کم از کم پچھلے دس سال تک کی ملازمت کی تاریخ درج کی جائے یا پھر جتنا تجربہ مانگا گیا ہے وہ شامل کریں۔

اگر ان تمام امور کو مدنظر رکھا جائے تو بہتر ملازمت کے حصول کے لیے عمدہ سی وی تخلیق کی جا سکتی ہے۔ آپ کی سی وی آپ کا پہلا تاثر ہوتی ہے۔ اچھی سی وی آپ کے انٹرویو دینے کے مواقع بڑھاتی ہے اس طرح ملازمت کے مواقع بھی بڑھتے ہیں۔ لہٰذا اس آرٹیکل کو ایک اچھی سی وی بنانے کے معاون کی حیثیت سے سمجھیں اور اپنی تخلیقی صلاحیتوں کے ساتھ سی وی بنائیں۔

See more from تحریر کے گر