Job interview808x234

انٹرویو کے دوران پوچھے جانے والے عمومی سوالات

دوران تعلیم یا تعلیم مکمل کر لینے کے بعد ہر فرد کو انٹرویو کے مرحلے سے گزرنا پڑتا ہے۔ عام طور پر انٹرویو سے یہی مراد لی جاتی ہے کہ شاید فرد سے بات چیت، صورت آشنائی یا اس کا عمومی تعارف ہی انٹرویو کی غرض و غایت ہے، تاہم انٹرویو محض اسی پر محیط نہیں۔ انٹرویو کے ذریعے فرد کی مخفی صلاحیتوں اور اس کے رویے کی پرکھ بھی مراد ہوتی ہے۔

اسی لحاظ سے انٹرویو میں پوچھے جانے والے سوالات کا تعلق اس کام کی نوعیت پر تو ہوتا ہی ہے جس کے لیے آپ انٹرویو دے رہے ہیں، لیکن اس کے ساتھ ساتھ کچھ ایسے سوالات بھی پوچھے جاتے ہیں جن سے آپ میں موجود دیگر صلاحیتوں کو بھی جانچا جاسکے، مثلاً آپ میں خوداعتمادی کا درجہ کتنا بلند ہے، آپ میں کس حد تک قائدانہ صلاحیتیں موجود ہیں، یا آپ میں خودانحصاری کا عنصر کس حد تک ہے، آپ کام کے لیے کتنے پرجوش ہیں، محنت اور برداشت کی خصوصیات کے حامل ہیں یا نہیں، جلد غصے میں آ جاتے ہیں یا ٹھنڈے مزاج کے ہیں، ٹیم ورک میں آپ اپنی صلاحیتوں کو کیونکر استعمال کر سکتے ہیں، اور آپ ہنگامی صورتحا ل یا تناؤ کے ماحول سے کس طرح اور کتنے اچھے طریقے سے باہر آ سکتے ہیں۔

یہ اور ایسی ہی بہت سی باتوں کو مد نظر رکھا جاتا ہے کیونکہ ادارے کو صرف ایسا شخص درکار نہیں ہوتا جو اپنے کام میں مہارت رکھتا ہو بلکہ ایسے شخص کی جستجو بھی ہوتی ہے جو ادارے میں قابل لوگوں کی تعداد میں اضافہ کر سکے جو ہر کام کرنے کی صلاحیت رکھتا ہو، بااعتماد ہو اور پہلے سے موجود ٹیم میں رچ بس جائے نیز اپنے تجربے اور قابلیت سے کمپنی کے لیے اہم اثاثہ ثابت ہو۔

انسانی ذہن کو قدرت نے وہ صلاحیتیں ودیعت کی ہیں کہ کوئی بھی انھیں کُلّی طور پر جاننے کا دعویٰ نہیں کر سکتا تاہم، کچھ عوامل ایسے ضرور ہوتے ہیں جن کی مدد سے ہم فرد کے مزاج، دلچسپیوں اور اس کے عمل و ردعمل کا اندازہ لگا سکتے ہیں۔ انٹرویو لینے والے حضرات آپ سے درست جواب کے ساتھ ساتھ آپ کا اعتماد بھی دیکھنا چاہتے ہیں اسی وجہ سے اکثر سوال اس لیے بھی پوچھے جاتے ہیں جن سے آپ کا اعتماد دیکھا جاسکے۔ بہت سے مشکل سوال پوچھنے کے پیچھے ایک یہ وجہ بھی کار فرما ہوتی ہے کہ یہ دیکھا جا سکے کہ آپ جواب کی تلاش میں کیا تجزیہ کرتے ہیں۔ انٹرویو لینے والے تمام باتوں کو مد نظر رکھتے ہوئے ہی کسی آخری فیصلے پر پہنچتے ہیں۔

اس مضمون میں ہم نے ایسے ہی سوالات پیش کیے ہیں جو عام طور پر انٹرویو میں پوچھے جاتے ہیں، تاکہ وہ افراد جو انٹرویو کے عمل سے گزرنے والے ہیں انھیں مدد مل سکے۔ ہم ہر گز یہ نہیں کہتے کہ آپ مکمل طور پر ان سوالات پر اکتفا کر لیں کیونکہ سوالات کا تعلق صرف آپ کے کام کی نوعت پر بھی ہو سکتا ہے جس میں ایسے تکنیکی سوالات پوچھے جائیں جو اس کام میں مہارت رکھنے والا ہی جانتا ہو۔ اس لیے انٹرویو کے عمل سے گزرنے والے حضرات سب سے پہلے تو خود کو پرسکون رکھیں اور اپنے کام سے متعلق جو معلومات آپ رکھتے ہیں انھیں اچھی طرح ذہن نشین کرلیں۔ پُراعتماد رہتے ہوئے ہر سوال اور ہر باریکی کو مدنظر رکھ کر پر سکون ہو کر جواب دیں، یقین رکھیں کہ اعتماد اور اپنے کام میں مہارت ہی دو ایسی باتیں ہیں جو ثابت کرتی ہیں کی آپ کسی ملازمت کے لیے کس قدر موزوں ہیں۔

ذیل میں دیے گئے سوالات کو اپنے انٹرویو سے پہلے کا ہدایت نامہ سمجھ سکتے ہیں۔

  1. اپنے متعلق مختصر بتائیں؟
  2. اس ملازمت کے متعلق آپ کو کیسے علم ہوا؟
  3. آپ اس ادارے کے بارے میں کیا جانتے ہیں؟
  4. آپ یہ ملازمت کیوں کرنا چاہتے ہیں؟
  5. آپ اپنی موجودہ ملازمت کیوں اور کن وجوہات کی بنا پر ترک کر رہے ہیں؟
  6. آپ کو پچھلی ملازمت سے برخاست کیا گیا ہے تو اس کی کیا وجوہات تھیں؟
  7. آپ فی الحال کوئی نوکری نہیں کر رہے تو اس کے پیچھے کیا وجوہات ہیں؟
  8. ہم اس نوکری کے لیے آپ کو ہی کیوں منتخب کریں؟
  9. آپ کی سب سے بڑی پیشہ ورانہ صلاحیت کیا ہے جسے آپ اپنی سب سے اہم طاقت خیال کرتے ہوں؟
  10. آپ کے خیال میں آپ کی سب سے بڑی کمزوری کیا ہے؟
  11. آپ کے اب تک کے کرئیر کی اہم کامیابیاں کون سی ہیں؟
  12. آپ کی تین اہم خصوصیات کون سی ہیں ؟
  13. اگر آپ کو کام کے دوران چیلنجوں اور تنازعات کا سامنا ہو تو ان سے نمٹنے کے لیے آپ کیا لائحہ عمل اختیار کرتے ہیں؟
  14. اگلے پانچ سال کے عرصے میں آپ خود کو کس مقام پر دیکھتے ہیں؟
  15. کس طرح کا کام کرنا آپ کا خواب ہے؟
  16. کیا آپ دوسری اداروں میں بھی انٹرویو دے رہے ہیں، یا دینے کی تیاری کر رہے ہیں؟
  17. آپ کام کرنے کے دوران کس قسم کا ماحول پسند کرتے ہیں؟
  18. جیسا کہ یہ نوکری انتظامی امور سے متعلق ہے تو آپ کیا سمجھتے ہیں کہ آپ کا انداز کیسا ہو گا، دوستانہ یا آمرانہ؟
  19. پچھلی نوکریوں میں آپ کا کردار قائدانہ تھا تو آپ کی قیادت میں آپ کی ٹیم کی کامیابیوں کا کیا گراف تھا؟
  20. آپ کے کام کے دوران وہ کون کون سی باتیں رہی ہیں جن سے آپ کو اختلاف تھا؟
  21. آپ کی ایک ملازمت سے دوسری ملازمت کے درمیان اتنا وقفہ کیوں ہے؟
  22. آپ نے اپنے کریئر کے راستوں کو اتنا تبدیل کیوں کیا ؟
  23. ٓپ کام کی زیادتی اور تھکا دینے والی صورتحال سے نمٹنے کے لیے کیا کرتے ہیں؟
  24. کس طرح کے چیلنج لینا آپ کو پسند ہیں؟
  25. کام کے ماحول میں ناپسندیدہ رویے کے جواب میں آپ کا ردعمل کیا ہوتا ہے؟
  26. آپ پہلے تین ماہ میں اپنے کام کے ذریعے خود کو کیسے منوائیں گے؟
  27. کام کے علاوہ آپ کی دیگر کیا مصروفیات ہیں؟
  28. پچھلے چھ ماہ میں آپ نے کون سے اہم فیصلے کیے؟
  29. کیا آپ اپنے بچوں کے لیے منصوبہ بندی کر رہے ہیں؟
  30. ٓخری بار آپ کے ساتھ کام کرنے والے آپ کے ساتھی آپ پر کب برہم ہوئے اور آپ کا کیا ردعمل تھا؟
  31. اگر آپ کوئی جانور ہوتے تو کون سا جانور ہوتے اور اس کی کس خاصیت کی بنا پر آپ وہ جانور ہوتے؟
  32. آپ کتنی ٹینس/ فٹبال کی گیندیں ایک مربع فٹ میں رکھ سکتے ہیں؟
  33. ہمارے ادارے کے بارے میں آپ جانتے ہیں؟ کیا اس کے مثبت یا کچھ منفی پہلوؤں سے آپ کو آگاہی ہے؟
  34. کیا آپ ہم سے یا ہمارے ادارے سے متعلق کوئی سوال کرنا چاہتے ہیں؟
  35. تنخواہ سے متعلق آپ کی کیا توقعات ہیں؟

See more from اردو مطالعہ