Blog 20header icb 530x226

اسلام آباد کے سب سے پرانے کالج میں اوکسفرڈ ڈکشنری کی تعارفی تقریب

گذشتہ منگل کو اوکسفرڈ اردو ڈکشنری نے اسلام آباد کے سب سے قدیم اور سب سے بڑے کالج اسلام آباد کالج فار بوائز میں ایک خصوصی سیمینار کا اہتمام کیا جس میں طلبہ کو اوکسفرڈ لِونگ ڈکشنری اور اوکسفرڈ گلوبل لینگویج انشی ایٹو  کے بارے میں بتایا گیا۔

اوکسفرڈ اردو ڈکشنری کے لینگویج مینیجر ظفر سید نے پاور پوائنٹ پریزنٹیشن دیتے ہوئے طلبہ کو دکھایا کہ اوکسفرڈ اردو ڈکشنری کس طرح سے عام ڈکشنریوں سے مختلف ہے۔ اس ڈکشنری کی خصوصیت یہ ہے کہ  اگر آ پ کو لگے کہ اس لغت میں کوئی لفظ موجود نہیں ہے تو آپ خود بھی اس لفظ کا اضافہ کر سکتے ہیں۔  اس کی وجہ یہ ہے کہ زبان ایک ایسا بہتا دریا ہے جس میں ہر وقت نئے الفاظ شامل ہوتے رہتے ہیں، پرانے الفاظ  عدم استعمال کے باعث متروک ہوتے چلے جاتے ہیں، جب کہ موجود الفاظ کے معنی بدلتے رہتے ہیں۔ اس لیے جوں ہی کوئی ڈکشنری کتابی شکل میں چھپ کر سامنے آتی ہے، وہ فوراً ہی متروک ہو جاتی ہے، کیوں کہ اس دوران الفاظ اپنی شکلیں بدل چکے ہوتے ہیں۔

لینگویج مینیجر نے اوکسفرڈ گلوبل انشی ایٹو کا تعارف کروایا کہ اس کے تحت اوکسفرڈ نے دنیا کی سو ایسی زبانوں کی نشان دہی کی ہے جن کے آن لائن وسائل بعض ترقی یافتہ زبانوں کے مقابلے پر کم ہیں، اور اس پروجیکٹ کے تحت اوکسفرڈ  ان زبانوں کو تقویت دینے کی کوشش کر رہی ہے، اور آن لائن اردو ٹو انگلش ڈکشنری اسی منصوبے کا حصہ ہے۔

اس موقعے پر طلبہ نے سوال کیا کہ اگر کوئی غلط لفظ شامل کر دے، یا کسی لفظ کے غلط معنی درج کر دے تو پھر کیا ہو گا؟

اس کاجواب یہ ہےکہ اوکسفرڈ اردو ڈکشنری کے اندر یہ سہولت رکھی گئی ہے کہ صارف کے شامل کردہ الفاظ کو واضح طور پر نشان زد کر دیا جاتا ہے، جس سے ڈکشنری سے استفادہ کرنے والے کو فوری طور پر اندازہ ہو جاتا ہے کہ یہ لغت کے اصل متن کا حصہ نہیں ہے اور اسے کسی صارف، جس کا نام اس کے شامل کردہ لفظ  کے ساتھ درج ہوتا ہے، نے لغت میں شامل کیا ہے۔

دوسری طرف یہ سہولت بھی رکھی گئی ہے کہ لوگ صارفین کے شامل کردہ الفاظ کو پسند یا ناپسند بھی کر سکتے ہیں۔ اگر کوئی غلط لفظ شامل ہو گیا تو لوگ اسے زیادہ تعداد میں ناپسند کر کے لغت کے منتظمین کو مطلع کر سکتے ہیں کہ کسی اندراج میں گڑبڑ ہے۔


اس کے علاوہ بھی لغت کے منتظمین باقاعدگی سے صارفین کے اندراج کا جائزہ لیتے رہتے ہیں، اور انھیں جونھی کوئی غلط اندراج ملتا ہے، وہ اسے حذف کر دیتے ہیں۔

اسلام آباد کالج فار بوائز کے پرنسپل رفیق سندیلوی، جو خود بھی اردو کے خوش گفتار شاعر اور زیرک نقاد ہیں، اوکسفرڈ گلوبل انشی ایٹو کی پذیرائی کی اور اس امید کا اظہار کیا کہ اس پیش رفت کی وجہ سے اردو کے ڈیجیٹل وسائل کو تقویت ملے گی اور اردو کو دنیا کی دیگر ترقی یافتہ زبانوں کے ہم پہلو ہونے میں مدد ملے گی۔  


See more from ​ثقافت و معاشرہ